Reports

នៅថ្ងៃទី៣០ ខែសីហា ឆ្នាំ២០២១ មន្រ្តីអនុវត្តគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប-ជំហាន ២ (TSSD-AF) ខេត្តព្រៃវែង បានចុះប្រគល់សម្ភារ និងតម្លើងទ្រុងមេសិប្បនិម្មិត នៅភូមិកំពង់ថ្នល់ ឃុំល្វា ស្រុកព្រះស្តេច ភូមិព្រែម្លុង ភូមិជាងដែក ឃុំជាងដែក និងភូមិតាអោង ឃុំអន្សោង ស្រុកកំពង់ត្របែក។

នៅថ្ងៃទី២៧ ខែសីហា ឆ្នាំ២០២១ មន្រ្តីអនុវត្តគម្រោងកាត់បន្ថយភាពក្រីក្រ និងអភិវឌ្ឈន៍កសិកម្មខ្នាតតូចតំបន់ទន្លេសាប-ជំហាន ២ (TSSD-AF) ក្រុងសិរីសោភ័ណ ខេត្តបន្ទាយមានជ័យ​ បានចុះផ្តល់សម្ភារៈបង្ហាញផលិតកម្មភ្ញាស់កូនមាន់ដល់កសិករបង្ហាញចំនួន២បង្ហាញ និងផ្តល់បច្ចេកទេសចិញ្ចឹមមាន់ ការរៀបចំទ្រុង ការដំឡើងទ្រុងមាន់ បច្ចេកទេសនៃការប្រើប្រាស់ទូរភ្ញាស់ នៅភូមិថ្មី សង្កាត់ភ្នៀត ក្រុងសិរីសោភ័ណ និងភូមិអង្គារបុស្ស សង្កាត់កោះពងសត្វ ក្រុងសិរីសោភ័ណ។

ថ្ងៃទី១៥-១៦ ខែមិថុនា ឆ្នាំ២០២១ មន្រ្តីអនុវត្តគម្រោងនៃខេត្តព្រៃវែង រួមមាន PAC PAMRIC AERISO CMAWs& SSP8 បានចុះពិនិត្យកម្មវិធីប្រជុំផ្សព្វផ្សាយបង្កើតក្រុមមីគនៅភូមិកន្សោមអក ឃុំកន្សោមអក បង្ហាញផលិតកម្មដំណាំបន្លែនៅភូមិរង្វះ១០០ ឃុំអន្សោងស្រុកកំពង់ត្របែក និងបង្ហាញផលិតកម្មដំណាំបន្លែនៅភូមិអន្លង់សរ ឃុំរំលេចស្រុកស៊ីធរកណ្តាល និងបង្ហាញចិញ្ចឹមត្រីអណ្តែងក្នុងផ្លាស្ទិកនៅភូមិតងឡងតី៣ ឃុំព្រៃខ្លា ស្រុកស្វាយអន្ទរ។

វឌ្ឍនភាពនៃការអនុវត្តគម្រោងកាត់បន្ថយភាពក្រីក្រ និងអភិវឌ្ឈន៍កសិកម្មខ្នាតតូចតំបន់ទន្លេសាប (TSSD-AF) - ជំហាន ២ គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប - ជំហាន ២ ត្រូវបានរៀបចំឡើងដើម្បីបង្កើនផលិតភាពកសិកម្ម និងកែលម្អលទ្ធភាពទីផ្សារលក់ផលិតផលរបស់កសិករ តាមឃុំសង្កាត់គោលដៅចំនួន២៧០ ក្នុង ៣៨ស្រុក ក្នុងខេត្តបាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ និង ព្រៃវែង។

គម្រោងមានបីសមាសភាគ គឺ៖

(១) កែលម្អហេដ្ឋារចនាសម្ព័ន្ធគាំទ្រផលិតភាពជនបទ និងជីវភាពរស់នៅ និងសមត្ថភាពគ្រប់គ្រងគ្រោះមហន្តរាយ

(២) អំណោយផលសម្រាប់បង្កើនផលិតភាពកសិកម្ម ពិពិធភាវូនីយកម្ម និងភាពធន់ទ្រាំនឹងបម្រែបម្រួលអាកាសធាតុ និង

(៣) ការគ្រប់គ្រងគម្រោងមានប្រសិទ្ធភាព

គម្រោងនេះប្រតិបត្តិដោយ ក្រសួងកសិកម្ម រុក្ខាប្រមាញ់ និងនេសាទ និង ក្រសួងមហាផ្ទៃ (លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍន៍ប្រជាធិបតេយ្យនៅថ្នាក់ក្រោមជាតិ) និងចូលរួមអនុវត្តដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្រសួងប្រៃសណីយ៍ និងទូរគមនាគមន៍ និងគណៈកម្មាធិការជាតិគ្រប់គ្រងគ្រោះមហន្តរាយ។ គម្រោងនេះមានគោលបំណង កែលម្អជីវភាពរស់នៅ និងភាពធន់ទ្រាំនឹងបម្រែបម្រួលអាកាសធាតុរបស់កសិករចំនួន ៦៥០ ០០០ គ្រួសារ នៅតាម ឃុំសង្កាត់គោលដៅចំនួន ២៧០ ក្នុងខេត្តប្រាំពីរ នៅតំបន់ជុំវិញបឹងទន្លេសាប។ គម្រោងកាត់បន្ថយភាពក្រីក្រ និងអភិវឌ្ឈន៍កសិកម្មខ្នាតតូចតំបន់ទន្លេសាប-ជំហាន ២(TSSD-AF)មានរយៈ ពេល៥ឆ្នាំ(ដោយចាប់ផ្តើមពី ខែមេសា ឆ្នាំ២០១៨ ដល់ ខែកុម្ភះ ឆ្នាំ២០២៣)។ គម្រោងមានថវិកាសរុប ចំនួន ៦៦ លានដុល្លារអាមេរិក ដែលក្នុងនោះរួមមាន៖

(១) កម្ចីចំនួន ៤៥ ៧២៥ លានដុល្លារអាមេរិកពីធនាគារអភិវឌ្ឍន៍អាស៊ី(ADB)

(២) ជំនួយឥតសំណងចំនួន ៤ ២៧៥ លានដុល្លារអាមេរិកពីធនាគារអភិវឌ្ឍន៍អាស៊ី

(៣) កម្ចីចំនួន ១០ លានដុល្លារអាមេរិក ពីមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) និង

(៤) ទុនបដិភាគ របស់រាជរដ្ឋាភិបាលកម្ពុជាចំនួន ៦លានដុល្លារអាមេរិក។

លទ្ធផលសំខាន់ៗតាមរយះ សមាសភាគទី2 សម្រេចបានដូចខាងក្រោមនេះ៖

(ក) ពត៌មានកសិកម្ម និងទិន្នន័យទីផ្សារ ៖

(១) បានបង្កើត និងពង្រឹងសមត្ថភាពជំនាញប្រាស្រ័យទាក់ទង និងសម្របសម្រួល និងវគ្គអំពីទីផ្សារឌីហ្យីថល (Digital Marketing) ដល់អ្នកផ្សព្វផ្សាយព័ត៌មានឃុំបានចំនួន ២៧០ នាក់

(២) បណ្តុះបណ្តាលអ្នកផ្សព្វផ្សាយឃុំ (CMAWs) និងមន្រ្តីគាំទ្រផ្សព្វផ្សាយកសិកម្មស្រុក (AERISOs) ស្ដីពីវិធីសាស្ត្រផ្សព្វផ្សាយកសិកម្មក្នុងខេត្តគោលដៅទាំងប្រាំពីរ បានចំនួនសរុប ៣០៧ នាក់។

(ខ) គាំទ្រការអភិវឌ្ឈន៍សង្វាក់តម្លៃ៖

(១) បង្កើតនិងពង្រឹងសមត្ថភាពដល់ក្រុមផលិតពូជស្រូវ បានចំនួន ៣៧ ក្រុម ក្នុងខេត្តទាំង៧ និងបានគាំទ្របច្ចេកទេសដល់ក្រុមក្នុងការផលិតពូជស្រូវដែលធន់ទ្រាំនឹងបម្រែបម្រួលអាកាសធាតុ និងមានតម្រូវការទីផ្សារខ្ពស់ បានចំនួន ៣ ៧៣៣ តោន,

(២) បានរៀបចំបណ្តុះបណ្តាល/បង្ហាញបច្ចេកទេសលើផលិតកម្មដំណាំស្រូវធន់ទ្រាំអាកាសធាតុនិងផលិតផល/ដំណាំក្រៅពីស្រូវបានចំនួន ៦២០បង្ហាញ ពីឆ្នាំ២០១៩ ដល់២០២១ ដែលមានអ្នកទទួលផល (ផ្ទាល់ និងមិនផ្ទាល់) ចំនួន ១០ ២៣១ នាក់ (ស្រ្តី ៦ ៥៦២ នាក់)។ ការបណ្តុះបណ្តាល/បង្ហាញបច្ចេកទេសទាំងនោះរួមមាន៖ បង្ហាញអំពីដំណាំស្រូវ ៨១កន្លែង, ដំណាំបន្លែ ១៣២កន្លែង, ដំណាំផ្សេងៗសម្រាប់លក់ ៣៩កន្លែង, កសិដ្ឋានចំរុះ ៥កន្លែង, ចិញ្ចឹមមាន់សាច់ ១២៦កន្លែង, ចិញ្ចឹមទាកាប៉ា ៥៣កន្លែង, ភ្ញាស់កូនមាន់ ៧៧កន្លែង, ភ្ញាស់ទាកាប៉ា ៧កន្លែង, ចិញ្ចឹមត្រី ៤៥កន្លែង, ចិញ្ចឹមកង្កែប ៤៦កន្លែង, និងភ្ញាស់កូនកង្កែប ៩កន្លែង។

(គ) គាំទ្រដល់ក្រុមកែលម្អទីផ្សារ៖

(១) បានរៀបចំបង្កើតក្រុមកែលម្អទីផ្សារ បានចំនួន ២១៦ ក្រុម ក្នុងនោះរួមមាន ក្រុមកែលម្អទីផ្សារមាន់បានចំនួន ១១៣ ក្រុម, ក្រុមកែលម្អទីផ្សារបន្លែបានចំនួន២៤ ក្រុម, ក្រុមកែលម្អទីផ្សារស្រូវបានចំនួន ៣៨ក្រុម និងក្រុមកែលម្អទីផ្សារចិញ្ចឹមត្រី/កង្កែបបានចំនួន ៤១ក្រុម។

(២) បានគាំទ្រនិងពង្រឹងសមត្ថភាពសហគ្រាសខ្នាតតូច បានចំនួន ៦០ សហគ្រាស។

បញ្ហាប្រឈមក្នុងការអនុវត្តសកម្មភាពរបស់គម្រោង

• ដោយសារបញ្ហារីករាលដាល នៃជម្ងឺកូវិដ អាជ្ញាធរមូលដ្ឋានមានការរឹតបន្តឹងការជួបជុំ ដែលមានអ្នកចូលរួមច្រើន និងការធ្វើដំណើរពីតំបន់មួយទៅតំបន់មួយ។ ការអនុវត្តន៍សកម្មភាពគម្រោងមួយចំនួនត្រូវបានពន្យារពេល និងមួយចំនួនត្រូវផ្អាកសកម្មភាពជាបណ្តោះអាសន្ន។

• ក្នុងតំបន់ខ្លះនៃគម្រោង ការចូលរួមរបស់កសិករក្នុងសកម្មភាពគម្រោងនៅមានកំរិត ដោយច្រើនតែមនុស្សចាស់ចូលរួម ចំណែកយុវជនមួយចំនួនបានចាកចេញទៅធ្វើការនៅតំបន់ផ្សេងក្រៅខេត្ត។

• ដោយសារការយល់ដឹង និងចំណេះវិជ្ជានៅមានកំរិតរបស់កសិករនៅជនបទ ក្រុមផលិតពូជស្រូវមួយចំនួន មានការលំបាកក្នុងការងារគ្រប់គ្រងក្រុម និងចាត់ចែងការងារផលិតពូជស្រូវ គឺទាមទារនូវការគាំទ្រពង្រឹងសមត្ថភាពពីគម្រោងជាបន្ត។

• ក្នុងតំណាក់កាលនៃការរីករាលនៃជម្ងឺកូវិដនេះ ក្នុងតំបន់ខ្លះកសិករដែលអនុវត្តការភ្ញាស់កូនមាន់លក់ជួបប្រទះបញ្ហានៃការធ្លាក់ថ្លៃក្នុងការលក់កូនមាន់ និងការបញ្ជាទិញក៏មានការថយចុះ។